Dari
mano titiak palito
Dibaliek
telong nan batali
Dari
mano asa niniek kito
Dari
lereang gunuang marapi
Dari
pariangan padang panjang, taruih ka Gunuang Talang, bajalan manuju daerah
selatan, sampai ka puncak Panjaringan.
Diriwayatkan
pada Abad ka Duo Baleh Masehi (Th. 1200......M), Dari puncak panjaringan,
Rombongan nan dipimpin Datuak Bandaro Sati, bajalan manurun manuruik batang
aie, sampai daerah kemiringan, disepakati baranti di situ, ditarukolah sawah
dengan ladang, dibuek rumah kadiaman, daerah nantun dibari namo Koto Nan
Balainyo Balai Satu, pakannyo tiok hari sabtu.
Tasabuiklah
Datuak kapalo kaum, nan bagala Datuk Rajo Lelo, mamaliharo tigo ikua kudo, nan
salalu lapeh dari pautan, pai minum manuju anak aie, dimuko sabuah guo.
Alkisah
pada suatu hari, hari nan sadang tangah hari, kudo marentak lapeh, lari manuju
anak aie, mancaliak kaadaan sarupo nantun, Datuak Kapalo Kaum maikuti, sampai
dilereang Bukik, dek kancang kudo balari, mako sikuo kudo jatuah kabawah jalan,
Datuak Kapalo Kaum sangeklah berang, mako manyumpah sakutiko, Dek Tuhan Maha
Kuaso, kudo nan jatuah tadi manjadi batu, Sampai kini disitu banamo Kudo Tagolek.
Kudo
nan duo taruih balari, sahinggo hilang dari pandangan, dek keadaan sarupo itu
diimbau urang nan banyak, mako Kudo nantun di Kaja’i mancari kudo nan hilang.
Dek
lambek lamo dijalan, sampailah dimuko sabuah Guo, Iolah Datuak Sutan Dilangik,
baduo jo Khatib Rajo, basobok kudo sadang minum. Lalu diimbaukan kapado urang
punyo, Datuak Rajo Lelo pun tibo, mancaliek kudo sadang minum, dihariek kareh
maso itu, nan sikuo lari kaateh, nan sikuo lai yaitu induak kudo hanyo tagak
badiri, sakadar maengong kabalakang, mako manjadi Batu Kudo nantun, sahinggo
banamo Guo Batu Kudo.
Kudo
nan sikuo larih kateh, sampai dibukik batu, tibo disinan kudo nantun, dek
kekuasaan tuhan dipacaliekkan, kudo itu pun jadi Batu, mako daerah nantun
banamo Batu Tangah.
Dicaliek
daerah sakitar Guo, daerah nan patuik untuak tampek diam, mungkin untuak
manaruko sawah jo ladang, kamudian dibaoklah anak kamanakan untuak pindah, ka
daerah baru nanko, mako daerah Koto banamo Koto
Tingga.
Takalo
Nagari ka dicacak, alun babalai-balai bamusajik, mako di Kaja’i untuak bamusyawarah, artinya tanpa persiapan yang mamadai, diundang
Datuak nan Sambilan, dari Limo Nagari, 2 urang Datuak dari Kubang, 2 dari Kolok,
2 Dari Lunto, 2 urang dari Siberambang sarato 1 urang Datuak dari Kajai,
sebagai nan tuo.
Tujuan
diadokkan rapek, nak bulek ayie ka pambuluah, bulek kato jo mufakat, tantangan
mancari Namo Nagari, manatapkan status tanah Nagari jo ulayat Suku, nan
balingkuang Aru nan babingkah tanah, sarato manatapkan undang-undang Nagari,
sarato undang-undang dalam Nagari.
Tibolah
Datuk nan Sambilan, duduak basanda dibatu nan sambilan pulo, didakek sabatang kayu
gadang, mako basidang Datuak-datuak disinan.
Tantangan
namo Nagari, ado tigo hal nan manjadi partimbangan:
1. Sabab
makonyo ditamukan daerah baru nanko, karano dek
kudo nan lapeh di Kaja’i, dek
urang sakampuang.
2. Terjadinyo
musyawarah tanpa persiapan memadai atau di Kaja’i.
3. Bamusyawarah
didakek sabatang kayu gadang, diagak dipandang-pandang, indak pueh mancaliak sajo, ditakiek batang
kayu nantun, bagatah kironyo kayu, dijujuik namuahnyo panjang, talalu
panjangnyo mangalantieng, mako tarnyato batang kayu nantun banamo Batang Kajai.
Mako
sapakek Datuak nan Sambilan, manatapkan namo Nagari yaitu Nagari Kajai.
Mengenai
tanah ulayat Suku yaitu nan babingka tanah, bagi Datuak ditiok suku dalam
mencari daerah baru, disebabkan mancari kudo nan hilang, apobilo sampai disuatu
daerah baru, itulah ulayat suku. Seperti contoh Datuak Pangulu Sutan dari suku
Melayu didaerah Mandailiang, Siranjau sampai ka Lurah Piubi dan Datuak
Mangkudun Sati di Sawah Gadang dan Bawah Gunuang, Datuak Sutan Dilangik dan
Khatib Rajo didaerah Pintu Guo Batu Kudo dari Suku Payobadar dan juo Datuak
Gindo Khatib di Galo-galo, Guguak Pulai dari Suku Caniago, Sarato Datuak
Bandaro Sati dari Suku Piliang yaitu di Sarang Tiong, Tambang Jirak, Pampuan
dan lain-lain.
Adapun
batas wilayah Nagari Kajai yang ditetapkan pada masa itu,sebagai warih nan
dijawek, pusako nan ditolong adalah sebagai berikut:
Nan
babateh jo Nagari Kubang, yaitu dari Gantieng Paku - Puncak Guguak Sulah -
Gantieng Limau Kapeh - sampai ka Puncak Batu Korak.
Dengan
Nagari Kolok, dari Lurah Duo Baleh - Guguak Sangoneh - Bak Putieh - Puncak
Guguak Cerek - Kandang Kudo - Datau Palangeh - taruih ka Sawah Niek Jonang -
sampai Kubang Tan Diaceh.
Sedangkan
bateh dengan Nagari Siberambang, adalah dari Kubang Tan Diaceh - Batu Laweh -
Cubadak Kambau - Sawah Niek Piruak - Lakuak Mansiro - Gantieng Pulai - Guguak
Sarai - Guguak Padusi - taruih Mudiek Aie ka Sarang Tiong - Gantieng Tambang
Jirak - Tanjuang Bonai - Galoga taruih ka Pandakian.
Bateh
dengan Nagari Lumindai, dari Mansayan - Puncak Subah - Guguak Muluk - Lurah
Piubi - Siranjau - Luak Jauh - Puncak Balang - Sampai Luak Limau Sundai.
Adapun
bateh jo Nagari Lunto, yaitu dari Batu Putieh - Pintu Gobang - Kapalo Rimbo -
Guguak Sangkau Puyuah - Gontieng Bonai - sampai ka Lontiek Surian.
Kamudian
dari pado itu, untuak manatapkan bateh pasupadan nagari limo, mako barlaku
hukum bamah, yaitu Datuak nan Sambilan basumpah, baghaib bakalamullah, disuatu
tampek sahinggo namo daerah tampek basumpah, banamo daerah tu sampai kini Batang Sumpahan.
Elok
ranahnyo Nagari Kajai, nan bagunuang babukik-bukik, nan bahutan barimbo labek,
nan babukik baguo batu, bagarai balurah dalam, nan tasabuik daerahnyo banamo
Siranjau Batu Tajam - Luak Ujuang - Batu Badongieng, Sialang Balantak Bosi,
Taroguang - Batu Badanguang, Guguak Bulek jo Guguak Pujan, Lakuang Gadang jo Galo-galo, Tanah Santo Pamakan Sirieh,
Luak Saok di Pisang Kalek.
Nan
lunak ditanam banieh, nan kareh dibuek ladang, nan boncah paliharo itiek,
ganangan katabek ikan, bukik batu katambang ameh, tambang timbago dengan perak,
batanam nan bapucuak, mamaliharo nan banyawa.
Sawahnyo
batumpak-tumpak, ladangnyo babidang-bidang, sawah batumpak di nan datau, ladang
nyo babidang di nan lereang, banda baliku turuik bukik, cancang latieh niniek
moyang, tambilang bosi urang tuo-tuo.
Suku
diagieh bapangulu, nagari baampek suku, dalam suku barumah gadang, kampuang
diagieh batuo, rumah dibari batungganai, nagari bapaga dengan undang kampuang.
Kampuang bapaga nan dibuek, nan basosok bajurami, bapandan pakuburan, balabuah
batapian, bakorong bakampuang, barumah batanggo, basawah baladang, babalai
bamusajik, Adatnyo basandi Syarak, Syarak basandi Kitabullah, Syarak mangato
Adat mamakai, Adat kewi Syaraknyo lazim.
Sumber
: Buku Monogafi Nagari Kajai, KAN Kajai,
2003
0 komentar:
Post a Comment
Silahkan tinggalkan komentar anda tentang tulisan ini...